Inscrición no Rexistro de Entidades de Acción Voluntaria de Galicia

O artigo 28 da Lei 3/2000, do 22 de decembro, do voluntariado de Galicia crea o Rexistro de Entidades de Acción Voluntaria de Galicia que é xestionado polo Servicio de Formación e Apoio Técnico do Voluntariado dependente da Dirección Xeral do Voluntariado.

A inscrición no rexistro será condición indispensable para:

• Integra-las accións, actividades e iniciativas das entidades de acción voluntaria no Plan galego para a promoción e fomento da acción voluntaria.

• Acceder ás axudas e subvencións públicas convocadas pola Xunta de Galicia.

• Subscribir convenios coas administracións públicas en materia de voluntariado.

O Decreto 405/2001 do 29 de novembro, polo que se regula o Rexistro de Entidades de Acción Voluntaria de Galicia desenvolve o marco legal e determina a organización e o procedemento de acceso ó dito rexistro.

Poderán inscribirse tódalas entidades de voluntariado con sede social na Comunidade Autónoma de Galicia e aquelas que desenvolvan programas e proxectos de interese xeral no ámbito de competencias da Comunidade Autónoma galega. Para iso deberán presentar diversa documentación .